Հայաստանի մասին

Անկախ նրանից՝ պատմության սիրահար եք, բնության երկրպագու, գուրման, թե արկածներ փնտրող, Հայաստանը ձեզ համար անպայման ինչ-որ հետաքրքիր բան ունի։

Այցելեք Հայաստան՝ ուսումնասիրելու պատմական վայրերը, հիանալու տպավորիչ ճարտարապետությամբ, ստեղծելու բնության ու մշակույթի գեղեցիկ լուսանկարներ, վայելելու համեղ ուտեստներ և խմիչքներ, հաճելի ժամանակ անցկացնելու ընկերների հետ բարերում ու ակումբներում, ինչպես նաև ստանալու ադրենալինով լի արկածների լիարժեք փորձառություն։

Մեր տեղակայումը

Հայաստանը գտնվում է Հայկական լեռնաշխարհում և զբաղեցնում է Եվրոպայի ու Ասիայի խաչմերուկում գտնվող կենտրոնական դիրք։ Հայաստանի տարածքը կազմում է մոտ 29 743 քառակուսի կիլոմետր։ Այն լեռնային երկիր է, որտեղ գեղատեսիլ բնապատկերները հաճախ կարելի է տեսնել անգամ մայրաքաղաք Երևանից։

Հայաստան այցելելու ևս մեկ կարևոր պատճառ է աշխարհի ամենահին, բայց միևնույն ժամանակ ամենաժամանակակից քաղաքներից մեկը՝ Երևանը։

Երևանի ճարտարապետությունը, մշակույթն ու սովորույթները հինն ու նորը ներդաշնակորեն համադրող ամբողջություն են։ Քաղաքում զբոսնելիս կարող եք նկատել թե՛ ժամանակակից ճարտարապետությամբ նորակառույց շենքեր, թե՛ 19-րդ դարի գեղեցիկ զարդանախշերով կառույցներ։ Որոշ շենքերում հինն ու նորը համադրված են մեկ ամբողջական ճարտարապետական լուծման մեջ։

Այցելեք Հանրապետության հրապարակը, Կասկադ համալիրն ու Գաֆէսճեան արվեստի կենտրոն, Օպերայի և բալետի թատրոնը։ Զբոսնեք Բուզանդի, Արամի և Աբովյան փողոցներով՝ բացահայտելու Երևանի ամենահին շինությունները։ Այցելեք նաև Վերնիսաժն ու Գումի շուկաները՝ Հայաստանի մի փոքրիկ մասնիկը ձեզ հետ տանելու համար։

Հյուրընկալություն

Քանի որ մեր հյուրընկալ բնավորությունը վաղուց արդեն լեգենդ է դարձել, Հայաստանը կարելի է համարել հյուրընկալության իսկական խորհրդանիշ։ Այստեղ օտարներ չկան՝ միայն հարազատ մարդիկ, որոնց պարզապես դեռ չեք հանդիպել։ Այս մթնոլորտը կզգաք ողջ Հայաստանում՝ թե՛ Երևանում, թե՛ մարզերում։

Անվտանգություն և հարմարավետություն

Զգացեք լիարժեք անվտանգություն։ Ցածր հանցավորության մակարդակի շնորհիվ Հայաստանը հիանալի ընտրություն է ընտանեկան ուղևորությունների համար։ Կարող եք ազատ տեղաշարժվել ցանկացած վայրում և ցանկացած ժամի՝ զգալով ձեզ ապահով և ընդունված։ Վայելեք ուշ երեկոյան զբոսանքները Երևանում կամ Հայաստանի ցանկացած այլ վայրում՝ միայնակ կամ ընտանիքի հետ։

Մատչելիություն

Հայաստանը մատչելի զբոսաշրջային ուղղություն է։ Այստեղ կարող եք վայելել համեղ ուտեստներ, այցելել բազմաթիվ տեսարժան վայրեր և հաճելի ժամանակ անցկացնել բարերում՝ բավականին ցածր ծախսերով։ Եթե փնտրում եք արագ, թարմացնող և մատչելի ուղևորություն, Հայաստանը լավագույն ընտրությունն է։

Ամեն ինչ՝ մեկ վայրում

Չնայած իր փոքր չափերին՝ Հայաստանը շատ բան ունի առաջարկելու։ Ցանկանո՞ւմ եք քայլարշավի գնալ․ այստեղ կան ավելի քան 60 քայլարշավային երթուղիներ։ Ցանկանո՞ւմ եք մասնակցել գաստրոտուրի․ Հայաստանը լի է հնարավորություններով՝ բացահայտելու տեղական խոհանոցի և խմիչքների հարուստ համերը։ Հետաքրքրվա՞ծ եք արկածներով, պատմությամբ և մշակույթով․ կարող եք զբաղվել ռաֆթինգով, թռնել զիփլայնով կամ այցելել մեր հարյուրավոր զբոսաշրջային տեսարժան վայրեր։